First Bell Class 2 Teacher's Note 10 March 2022

RELATED POSTS

ഓൺലൈൻ ക്ലാസ്സിനു ശേഷം കുട്ടികളുമായുള്ള ആശയ വിനിമയം നടത്തുന്നതിനായി കാസർഗോട്ടെ AJBS Yelkana യിലെ അധ്യാപകനായ ശ്രീ.ജോസ് പ്രസാദ് സാർ എഴുതി തയാറാക്കുന്ന 'ടീച്ചേഴ്സ് നോട്ട് '. കേരളത്തിലെ രണ്ടാം ക്‌ളാസിൽ പഠിപ്പിക്കുന്ന അധ്യാപകർക്കും കുട്ടികൾക്കും അവരുടെ മാതാപിതാക്കൾക്കും അന്നന്നു പഠിപ്പിച്ച കാര്യങ്ങൾ ഇതിലൂടെ എളുപ്പം മനസ്സിലാക്കാനും പിന്നോക്കക്കാരായ കുട്ടികൾക്ക് വായിച്ചു കൊടുക്കാനും സാധിക്കും.ഇതുവരെ പോസ്റ്റ് ചെയ്ത ടീച്ചേർസ് നോട്ട് ലഭിക്കാൻ ഇവിടെ ക്ലിക്ക് ചെയ്യുക. ഇന്നത്തെ ക്‌ളാസുമായി ബന്ധപ്പെട്ട കാര്യങ്ങൾ താഴെ നൽകുന്നു.
Mathematics - 57. Unit 8. ഒരു യാത്രയും ഒത്തിരി കാര്യവും
കുറച്ചു രൂപയുമായാണ് ടീച്ചർ ക്ലാസ്സിലേക്കു വന്നത്. എല്ലാം 10 രൂപാ നോട്ടുകളാണ്. വലത്തേ കൈയിൽ 3 നോട്ടുകളും ഇടത്തേ കൈയിൽ 4 നോട്ടുകളുമാണ് ഉള്ളത്. ആകെ എത്ര രൂപയാണുള്ളത്?
ആകെ ഏഴ് 10 രൂപ നോട്ടുകളാണ് ഉള്ളത്. ഏഴ് 10 കൾ ചേർന്നാൽ 70 ആണെന്ന് എല്ലാവർക്കും അറിയാമല്ലോ.

ഗുണിക്കാൻ പഠിക്കാം
ബസ്സിലെ സീറ്റുകളുടെ ചിത്രീകരണമാണ് ടീച്ചർ കാണിച്ചത്.
ഒരു സീറ്റിൽ 2 കുട്ടികൾ
ആകെ 6 സീറ്റുകൾ
ആകെ എത്ര കുട്ടികൾ?
2 പേർ വീതമുള്ള 6 കൂട്ടം.
2 + 2 + 2 + 2 + 2 + 2 = 12 
ഇവിടെ 2 നമ്മൾ 6 തവണ എഴുതി കൂട്ടി. ഇങ്ങനെ ആവർത്തിച്ച് എഴുതി കൂട്ടുന്നതിനെയാണ് ഗുണനം എന്നു പറയുന്നത്. ഇതിനെ
6 ഗുണിക്കണം 2 = 12 എന്നോ
6 പ്രാവശ്യം 2 ചേർന്നാൽ 12 ആവും
എന്നോ പറയാം.
ഗുണനത്തിന് ഒരു ചിഹ്നമുണ്ട്.
x ഇങ്ങനെയാണത്.

 ഗണിത ചിഹ്നങ്ങൾ
+ കൂട്ടണം, സങ്കലനം
- കുറയ്ക്കണം, വ്യവകലനം
= സമം, തുല്യമാണ്

എന്നീ ചിഹ്നങ്ങൾ നമുക്ക് അറിയാം. അതിനോടൊപ്പം ഇന്ന് നമ്മൾ പഠിക്കുന്നത്
x ഗുണിക്കണം, ഗുണനം
എന്ന ചിഹ്നമാണ്.
ഈ ചിഹ്നങ്ങൾ ഉപയോഗിച്ച് ഓരോ ക്രീയകൾ എഴുതി നോക്കാം.
6 + 2 = 8
(ആറ് കൂട്ടണം രണ്ട് സമം എട്ട്)
6 - 2 = 4
(ആറ് കുറയ്ക്കണം രണ്ട് സമം നാല്)
6 x 2 = 12
(ആറ് ഗുണിക്കണം രണ്ട് സമം പന്ത്രണ്ട്)

ആവർത്തന സങ്കലനമാണ് ഗുണനം
2 + 2 + 2 + 2 + 2 + 2 എന്നിങ്ങനെ രണ്ടിനെ 6 തവണ എഴുതി കൂട്ടിയപ്പോഴാണല്ലോ 12 കിട്ടിയത്. ഇതിനെയാണ് നമ്മൾ
6 x 2 = 12
എന്ന് എളുപ്പത്തിൽ എഴുതിയത്.

പത്ത് രണ്ടുകൾ ചേർന്നാൽ...
2 പേർ ഇരിക്കുന്ന 10 സീറ്റുകളാണ് ടീച്ചർ പിന്നീട് കാണിച്ചത്. ആകെ എത്ര കുട്ടികൾക്ക് ഇരിക്കാം?

ഒരു സീറ്റിൽ 2 പേർ
10 സീറ്റിൽ? 10 x 2 = 20 പേർ
(പത്ത് ഗുണിക്കണം രണ്ട് സമം ഇരുപത്)

10 എണ്ണം 2 കൾ ചേർന്നാൽ 20
ഗുണനം എത്ര എളുപ്പമാണ്, അല്ലേ? ഇത് ശരിക്കു മനസ്സിലാവാത്തവർ 10 തവണ 2 എഴുതി കൂട്ടി നോക്കിക്കൊള്ളൂ. ഇതേ ഉത്തരം തന്നെ ലഭിക്കും. കാരണം ആവർത്തന സങ്കലനമാണല്ലോ ഗുണനം.

മോട്ടോർ സൈക്കിൾ റാലി
പാഠപുസ്തകത്തിലെ ഈ പ്രവർത്തനം എല്ലാവരും പൂർത്തിയാക്കി അയയ്ക്കണം. വർക്ക് ഷീറ്റ് അയച്ചു തരുന്നതാണ്.

2 കൊണ്ടുള്ള ഗുണനം മാത്രമാണ് നമ്മൾ ഇന്നു പഠിച്ചത്. ഇത് നന്നായി മനസ്സിലാക്കാൻ കൂട്ടുകാർ ഗണിതമൂലയിലുള്ള ഏതെങ്കിലും വസ്തു എടുത്ത് (ഉദാ: മഞ്ചാടിക്കുരു) 2 ൻ്റെ പല കൂട്ടങ്ങളാക്കി വെക്കണം. 1 കൂട്ടത്തിൽ എത്രയാണ്? (1x 2 = 2), 2 കൂട്ടങ്ങൾ ചേർന്നാൽ എത്രയാവും? (2 x 2 = 4), 3 കൂട്ടങ്ങൾ ചേർന്നാൽ എത്രയാവും? (3 x 2 = 6)... എന്നിങ്ങനെ എണ്ണി നോക്കി കണ്ടുപിടിക്കണം. നിങ്ങൾ കണ്ടു പിടിച്ച കാര്യങ്ങൾ ക്രമത്തിൽ താഴെ താഴെ എഴുതി വെച്ചാൽ അത് രണ്ടിൻ്റെ ഗുണന പട്ടികയായി.

Your Class Teacher

Teachers Note



Post A Comment:

0 comments: